Loading...

8, అక్టోబర్ 2010, శుక్రవారం

వాయుగుండంగా మారిన అల్పపీడనం

విశాఖపట్నం: పశ్చిమ మధ్య బంగాళాఖాతంలో ఏర్పడిన అల్పపీడనం మరింత బలపడి వాయుగుండంగా మారింది. గురువారం సాయంత్రానికి ఇది విశాఖకు ఆగ్నేయంగా 180 కిలోమీటర్ల దూరంలో కేంద్రీకృతమై ఉంది. రాబోయే 24 గంటల్లో ఇది మరింత బలపడే అవకాశం ఉందని వాతావరణ పరిశోధన కేంద్రం తెలిపింది. దీని ప్రభావం వల్ల సముద్రం అల్లకల్లోలంగా ఉంటుంది. గంటకు 40-50 కిలోమీటర్ల వేగంతో గాలులు వీస్తాయి. మత్స్యకారులు సముద్రంలో వేటకు వెళ్లరాదని కేంద్రం సూచించింది. వాయుగుండం ప్రభావం వల్ల ఒడిషా, ఉత్తరకోస్తాలో భారీ వర్షాలు, తెలంగాణ, రాయలసీమలో జల్లులు పడే అవకాశం ఉంది. విశాఖ, గంగవరం, కాకినాడ, కళింగపట్నం ఓడరేవుల్లో మూడో నెంబరు ప్రమాద హెచ్చరికను, ఇతర చోట్ల ఒకటో నెంబరు హెచ్చరికను ఎగరవేశారు. వాతావరణానికి అమావాస్య ప్రభావం కూడా తోడవడంతో విశాఖలో సముద్ర కెరటాలు ఎగసిపడుతున్నాయి. వాసవానిపాలెం, జాలారి ఎండాడ, శివగణేశ్‌నగర్‌లో మత్స్యకారుల ఇళ్లలోకి సముద్రపు నీరు వచ్చిచేరింది. దీంతో ఆ ఇళ్లలో ఉంటున్నవారు కలవరపడ్డారు. కాసేపటికి నీరు వెనక్కి వెళ్లిపోవడంతో ఊపిరి పీల్చుకున్నారు. అలల తాకిడికి తీరంలో ఉన్న కొన్ని పడవలు ఒడ్డున ఉన్న మత్స్యకారుల ఇళ్ల వద్దకు కొట్టుకువచ్చాయి.

వ్యాఖ్యలు లేవు:

వ్యాఖ్యను పోస్ట్ చెయ్యండి