Loading...

19, నవంబర్ 2010, శుక్రవారం

శ్రీలంక అధ్యక్షుడిగా రాజపక్సే ప్రమాణం

కొలంబో: శ్రీలంక అధ్యక్షుడిగా మహీందా రాజపక్సే(65) రెండోధపా శుక్రవారం ప్రమాణ స్వీకారం చేశారు. సుప్రీంకోర్టు ప్రధాన న్యాయమూర్తి అశోక డిసిల్వా ఆయనతో ప్రమాణం చేయించారు. అట్టహాసంగా జరిగిన ఈ కార్యక్రమానికి మాల్దీవుల అధ్యక్షుడు మహ్మద్‌ నషీద్‌, భూటాన్‌ ప్రధానమంత్రి జిగ్మే థిన్లే అతిథులుగా హాజరయ్యారు. అధ్యక్షుడి ప్రమాణస్వీకారం సందర్భంగా శుక్రవారం దేశవ్యాప్తంగా సెలవుదినం పాటించారు. పాఠశాలల్లో విద్యార్థుల కోసం కార్యక్రమాన్ని ప్రత్యక్ష ప్రసారం చేశారు. వారంరోజులపాటు వేడుకలు నిర్వహించాలని ప్రభుత్వం ప్రకటించింది. ఈ ప్రమాణాన్ని బహిష్కరించాలని ప్రతిపక్షాలు యునైటెడ్‌ నేషనల్‌ పార్టీ(యూఎన్‌పీ), మార్స్కిస్టు-లెఫ్టిస్టు జేవీపీ పిలుపునివ్వడంతో పటిష్ఠమైన భద్రతా చర్యలు చేపట్టారు. ఈ రెండు పార్టీలు మద్దతిచ్చిన మాజీ సైనికాధిపతి శరత్‌ఫోన్సెకా అధ్యక్ష ఎన్నికల్లో రాజపక్సే చేతిలో ఓటిమి పాలయ్యారు. రాజపక్సే తన వైభోగాన్ని చాటుకోవడానికి ప్రజాధనాన్ని విచ్చలవిడిగా ఖర్చు చేస్తున్నారని యూఎన్‌పీ నేత జయసూర్య విమర్శించారు.శ్రీలంకను ఆసియాలో అద్భుతమైన దేశంగా తీర్చిదిద్దుతానని అధ్యక్షుడు రాజపక్సే ప్రకటించారు. ప్రమాణస్వీకారం అనంతరం ఆయన ప్రసంగించారు. శాంతి సౌభాగ్యాలతో కూడిన సరికొత్త శ్రీలంకను ఆవిష్కరిస్తానని చెప్పారు. దేశాన్ని బలమైన ఆర్థిక శక్తిగా మారుస్తానన్నారు. తాను ఇచ్చిన హామీలన్నింటినీ తప్పనిసరిగా నెరవేరుస్తానని పేర్కొన్నారు.

వ్యాఖ్యలు లేవు:

వ్యాఖ్యను పోస్ట్ చెయ్యండి