Loading...

27, డిసెంబర్ 2010, సోమవారం

సంయమనం పాటించాలి...టీవీ ఛానళ్లకు ఎన్‌బీఏ సూచన

న్యూఢిల్లీ: తెలంగాణ అంశంపై ఈ నెల 31వ తేదీన శ్రీ కృష్ణ కమిటీ నివేదిక విడుదల చేయనున్న నేపథ్యంలో ఆయా వార్తల కవరేజీలో సున్నితంగా వ్యవహరించాల్సిందిగా 'న్యూస్‌ బ్రాడ్‌కాస్టర్స్‌ అసోసియేషన్‌' (ఎన్‌బీఏ) వివిధ వార్తా ఛానళ్లను కోరింది. ఈ మేరకు ఎన్‌బీఏ సభ్యులందరికీ వర్తమానం పంపింది.
ప్రసారం చేసే ఏ అంశం కూడా సంచలనాత్మకంగా...ఉద్రిక్తతను ప్రేరేపించే విధంగా ఎట్టి పరిస్థితుల్లోనూ ఉండరాదని ఎన్‌బీఏ స్పష్టం చేసింది.
* ప్రజాప్రయోజనాలు... మతసామరస్యం... శాంతియుత సహజీవనానికి ఏ మాత్రం భంగం కలగని రీతిలో మాత్రమే వార్తల ప్రసారం ఉండాలి.

* విభిన్న ప్రజల సమాహారమైన మన సామాజిక లౌకిక విలువలను దెబ్బతీసే పోకడలను పరిహరించాలి.

* మీడియా అందించే సమాచారం ప్రజలపై గట్టి ప్రభావాన్ని చూపుతుందనే విషయాన్ని సంబంధిత సంస్థలు విస్మరించనే కూడదు.

* ఒక్క మాటలో చెప్పాలంటే శ్రీకృష్ణ కమిటీ నివేదికకు సంబంధించిన వార్తలు ఎక్కడా నైతిక విలువల లక్ష్మణరేఖను దాటనే కూడదు. ఎప్పటికప్పుడు విడుదలయ్యే మార్గదర్శకాల పరిధిని అతిక్రమించనే కూడదు.
* శ్రీకృష్ణ కమిటీ నివేదికలో పేర్కొన్న అంశాలకు మాత్రమే వార్తల కవరేజీ కచ్చితంగా పరిమితం కావాలి.
* హింస, ఆందోళనలు, ఆత్మాహుతులకు సంబంధించిన ఏ తరహా ఫుటేజిని కూడా ప్రసారం చేయకూడదు.
* నివేదికకు సంబంధించి నిరసన ప్రదర్శనలు...ఆనందం వ్యక్తం చేస్తూ నిర్వహించే ఉత్సవాల ఫొటోల జోలికి వెళ్లకూడదు.
* అంతేకాదు, శ్రీకృష్ణ కమిటీ నివేదికకు సంబంధించి ప్రసారం చేసే అన్నిరకాల కార్యక్రమాలను పదిల పరచాలి. దానికి సంబంధించిన రాత ప్రతులను సైతం భద్రపరచాలనీ...మున్ముందు ఏదైనా పరిశీలన నిమిత్తం అవసరం పడితే పనికివస్తాయని ఎన్‌బీఏ కోరింది.

వ్యాఖ్యలు లేవు:

వ్యాఖ్యను పోస్ట్ చెయ్యండి