Loading...

18, ఏప్రిల్ 2011, సోమవారం

రాష్ట్రానికి మళ్ళీ కేంద్ర బలగాలు

హైదరాబాద్‌: తాత్కాలికంగా సద్దుమణిగిన ప్రత్యేక రాష్ట్ర ఉద్యమం మళ్లీ ఉద్ధృతమయ్యే సూచనల నేపథ్యంలో రాష్ట్రానికి మళ్లీ కేంద్ర బలగాలను రప్పిస్తున్నారు. ఇప్పటికే 20 కంపెనీలు రాజధానికి చేరుకోగా రాబోయే రోజుల్లో మరో 30 కంపెనీలు చేరుకుంటాయని భావిస్తున్నారు. శ్రీకృష్ణ కమిటీ నివేదిక సమర్పించిన...
తర్వాత ఉద్రిక్త పరిస్థితులు తలెత్తుతాయన్న ఉద్దేశంలో ముందు జాగ్రత్తగా గత డిసెంబరు నెలలోనే పెద్దఎత్తున కేంద్ర బలగాలను రప్పించారు. దాదాపు వంద కంపెనీలకు పైగా బలగాలు బందోబస్తు విధులు నిర్వర్తించాయి. ఐదు రాష్ట్రాల ఎన్నికల నేపథ్యంలో మన రాష్ట్రం నుంచి కేంద్రం తన బలగాలను వెనుక్కు పిలిపించింది. ఆయా రాష్ట్రాల్లో ఎన్నికల ప్రక్రియ పూర్తి కావస్తున్నందున కేంద్ర బలగాలకు వెసులుబాటు కలిగింది. ఇదే సయయంలో మే తర్వాత ప్రత్యేక రాష్ట్ర ఉద్యమం ఉద్ధృతమవుతుందని కొన్ని రాజకీయ పక్షాలు బహిరంగంగానే ప్రకటిస్తున్నాయి. దాంతో ముందు జాగ్రత్త చర్యగా అదనపు బలగాలను పంపాలంటూ రాష్ట్ర పోలీసుశాఖ కేంద్రాన్ని కోరింది. ఈ మేరకు తొలి విడతగా 20 కంపెనీల బలగాలు ఇప్పటికే రాష్ట్ర రాజధానికి చేరుకున్నాయి. సోమవారం హనుమాన్‌ జయంతి సందర్భంగా హైదరాబాద్‌లో ర్యాలీ నిర్వహించనున్న నేపథ్యంలో ఈ బలగాలతో బందోబస్తు ఏర్పాటు చేస్తున్నారు. కొద్దిరోజుల్లో మరో 30 కంపెనీల బలగాలు రానున్నాయి. వీటన్నింటినీ ప్రస్తుతానికి హైదరాబాద్‌లోనే ఉంచి ఆ తర్వాత అవసరాలను బట్టి ఇతర ప్రాంతాలకు పంపాలని అధికారులు భావిస్తున్నారు.

వ్యాఖ్యలు లేవు:

వ్యాఖ్యను పోస్ట్ చెయ్యండి