Loading...

27, నవంబర్ 2012, మంగళవారం

పదో తరగతి బాలికను రేప్ చేసిన హెడ్ మాస్టర్

 భువనేశ్వర్: గిరిజన ఆశ్రమ పాఠశాలలో పదో తరగతి చదువుతున్న ఓ గిరిజన బాలికను ప్రధానోపాధ్యుడే రేప్ చేశాడు. ఒడిషాలోని కలహండి జిల్లాలో ఈ సంఘటన చోటు చేసుకుంది. ఈ ఘాతుకానికి పాల్పడిన అంపాని సేవాశ్రమ్ పాఠశాల హెడ్ మాస్టర్ నకుల్ సబార్‌ను ఉన్నతాధికారుల అనుమతితో సస్పెండ్ చేశారు.... ఈ విషయాన్ని జిల్లా సంక్షేమశాఖ అధికారి ఎస్‌కె మొహమ్మద్ చెప్పారు.
వివరాలు ఇలా ఉన్నాయి... ఎస్‌టి బాలికల హాస్టల్ వద్ద ఉన్న తన గదికి నవంబర్ 22వ తేదీన హెడ్ మాస్టర్ బాలికను పిలిపించాడు. దాంతో ఆమె వచ్చింది. ఆ బాలికపై బలవంతంగా అతను అత్యాచారం చేశాడు. విషయాన్ని ఆ తర్వాత తోటి బాలికలకు ఆమె చెప్పింది.
సేవాశ్రమ్ ప్రధాన ద్వారానికి తాళం వేసి ఉంచి, బాలికలను బయటకు వెళ్లనీయరు. దీంతో బాలికలు ఏమీ చేయలేకపోయారు. గ్రామస్థులకు ఈ సంఘటన గురించి మొన్న తెలిసింది. పాఠశాల వద్ద వారు ధర్నా చేసారు. హెడ్ మాస్టర్‌ను గ్రామస్థులు చితక బాదారు.

సంఘటనను నిరసిస్తూ గ్రామస్థులు 201 జాతీయ రహదారిపై బైఠాయించారు. దాంతో పోలీసులు హెడ్‌ మాస్టర్‌ను అరెస్టు చేసి బాలికను వైద్య పరీక్షల నిమిత్తం పంపించారు. నిందితుడిని బాలికల హాస్టల్ ఆవరణలో ఉండనీయడాన్ని నిరసిస్తూ గ్రామస్థులు అధికార వర్గాలపై దాడికి పూనుకున్నారు.

వ్యాఖ్యలు లేవు:

వ్యాఖ్యను పోస్ట్ చెయ్యండి