Loading...

21, డిసెంబర్ 2012, శుక్రవారం

ఫైనాన్స్' కేసులపై దర్యాప్తునకు ప్రత్యేక బృందం

గొలుగొండ, చైతన్యవారధి: నర్సీపట్నం ప్రాంతంలో అధిక వడ్డీలు ఆశ చూపించి ప్రజల నుంచి భారీ మొత్తంలో నగదు వసూలు చేసి బోర్డు తిప్పేస్తున్న మనీ సర్క్యూలేషన్ కంపెనీలపై నమోదు అవుతున్న కేసుల దర్యాప్తునకు ప్రత్యేక పోలీసు బృందాన్ని ఏర్పాటు చేయనున్నట్టు నర్సీపట్నం ఏఎస్‌పీ తఫ్సీర్ఇక్బాల్ వెల్లడించారు. గురువారం
ఆయన  మాట్లాడుతూ, ఇతర పనుల ఒత్తిడి కారణంగా ఈ కేసుల దర్యాప్తునకు పూర్తిసమయం కేటాయించలేక పోతున్నామన్నారు. అందువల్ల ఇద్దరు సర్కిల్ ఇన్‌స్పెక్టర్ల స్థాయి అధికారులతో కూడిన ప్రత్యేక బృందానికి కేసుల దర్యాప్తు అప్పగిస్తామని, ఇందుకోసం ఉన్నతాధికారుల అనుమతి కోరామన్నారు. పట్నాల కేసుకు సంబంధించి మరికొంత మందిని త్వరలో అరెస్టు చేస్తామని ఏఎస్పీ చెప్పారు. మేజిక్, ఐరావత్ కంపెనీల కేసులకు సంబంధించి పూర్తి ఆధారాలు, వివరాలు సేకరిస్తున్నామని తెలిపారు. విద్యాధికులు, ఉద్యోగులు సైతం ఇటువంటి మోసపూరిత సంస్థల్లో డబ్బు డిపాజిట్ చేయడం విచారించదగ్గ విషయమన్నారు. ఒకవైపు కొన్ని కంపెనీలు బోర్డు తిప్పేస్తున్నా, మరొకవైపు అధిక వడ్డీల ప్రచారానికి ఆశపడి మిగతా కంపెనీల్లో డబ్బులు డిపాజిట్ చేయడం శోచనీమయని అన్నారు. ఈ విషయంలో పోలీసులను తప్పుపట్టడం తగదని ఏఎస్పీ అన్నారు.

వ్యాఖ్యలు లేవు:

వ్యాఖ్యను పోస్ట్ చెయ్యండి