Loading...

8, డిసెంబర్ 2012, శనివారం

జపాన్‌లో భారీ భూకంపం

టోక్యో: శక్తిమంతమైన భూకంపం శుక్రవారం ఈశాన్య జపాన్‌ను వణికించింది. సముద్రంలోపల సంభవించిన ఈ ప్రకంపనల వల్ల మీటరు ఎత్తున్న సునామీ అలలు వచ్చాయి. రాజధాని టోక్యోలో భవనాలు కంపించడంతో, ప్రజలు ప్రాణాలు అరచేతపట్టుకొని బయటకు పరుగులు తీశారు. గత ఏడాది దాదాపు 20వేల మందిని బలిగొన్న
భూకంపాన్ని ఇది గుర్తుకు తెచ్చింది. తాజా విపత్తు వల్ల ఎవరైనా గాయాలైనట్లు ఇంతవరకూ వార్తలు రాలేదని పోలీసులు తెలిపారు. సునామీ నుంచి తప్పించుకోవడానికి ప్రయత్నిస్తూ 75ఏళ్ల మహిళ ఒకరు గాయాలపాలైనట్లు అధికార టీవీ ఛానల్‌ ఎన్‌హెచ్‌కే పేర్కొంది. సెందాయ్‌ నగరంలో మరో చిన్నారి కూడా గాయపడినట్లు వెల్లడించింది. ఈ భూకంపం తీవ్రత రిక్టర్‌ సూచీపై 7.3గా నమోదైంది. భారతకాలమానం ప్రకారం మధ్యాహ్నం 1.48గంటలకు ఇది సంభవించింది. మియాగి ప్రిఫెక్చర్‌ తీరానికి 240 కిలోమీటర్ల దూరంలో పసిఫిక్‌మహాసముద్రంలో భూకంపకేంద్రం ఉన్నట్లు జపాన్‌ వాతావరణ పరిశోధన సంస్థ తెలిపింది. ప్రకంపనల తీవ్రత ఇవాటే, మియాగీ, అవోమోరి, ఇబ్రాకీ, టోచిగి ప్రిఫెక్చర్లలో కనిపించింది. భూకంపంనేపథ్యంలో సునామీహెచ్చరికలు జారీచేశారు. ప్రజలను సురక్షిత ప్రాంతాలకు తరలించారు. సునామీ వచ్చిన దాదాపు గంట తర్వాత మీటరు ఎత్తున్న సునామీ అల మియాగి ప్రిఫెక్చర్‌లోని ఇషినోమాకీని తాకాయి. అణు కర్మాగారాల్లో ఎలాంటి అసాధారణ పరిస్థితులు తలెత్తలేదని ప్రభుత్వం తెలిపింది. కొన్ని ప్రాంతాల్లో బుల్లెట్‌ రైళ్లను నిలిపివేశారు. టోక్యోలో ఒక సభను ఉద్దేశించి ప్రసంగించాల్సిన ప్రధాన మంత్రి యోషిహికో నోడా.. దాన్ని రద్దు చేసుకొని, పరిస్థితిని సమీక్షించడానికి తన కార్యాలయానికి తిరిగొచ్చారు.

వ్యాఖ్యలు లేవు:

వ్యాఖ్యను పోస్ట్ చెయ్యండి