Loading...

2, జనవరి 2013, బుధవారం

మూడో గురువారం పూజలకు ఏర్పాట్లు

విశాఖపట్నం, చైతన్యవారధి: కనకమహాలక్ష్మి అమ్మవారి మార్గశిర మాసోత్సవాల్లో భాగంగా మూడో గురువారం పూజలకు దేవస్థానం అధికారులు ఏర్పాట్లు చేస్తున్నారు. ఆ రోజున అమ్మవారిని దర్శించుకునేందుకు భక్తులు భారీగా తరలివచ్చే అవకాశాలున్నాయి. లక్ష మందికి పైగా భక్తులు వస్తారని దేవస్థానం అధికారులు అంచనా
వేస్తున్నారు. దీనికి తగ్గట్టుగా ఏర్పాట్లు చేయాలని, తొక్కిస లాటలు, వి.ఐ.పి. దర్శనాల లైన్ల వద్ద ఇబ్బందులు కలగకుండా అవసరమైన చర్యలను తీసుకుంటున్నారు. బుధవారం అర్ధరాత్రి 12.05 గంటలకు అమ్మవారికి దేవస్థానం పరంగా విశేష పంచామృతాభిషేకం నిర్వహిస్తారు. కుంకుమపూజ, పాలాభిషేక వంటి సేవలు కొనసాగిస్తారు. ముందుగా టిక్కెట్లు తీసుకున్న ఉభయదాతలను ఈ పూజలకు అనుమతిస్తారు. అర్ధరాత్రి దాటాక 2గంటల నుంచి దర్శనాలకు భక్తులను అనుమతిస్తారు. అప్పటి నుంచి గురువారం సాయంత్రం వరకు నిరంతరాయంగా దర్శనాలు కొనసాగుతాయి. అర్ధరాత్రి నుంచే భక్తుల తాకిడి ఉండే అవకాశాలున్నాయి. బుధవారం సాయంత్రం నుంచి ట్రాఫిక్‌ను మళ్లిస్తున్నామని దేవస్థానం ఈఓ డి.భ్రమరాంబ తెలిపారు. టౌన్‌కొత్తరోడ్డు నుంచి పోర్టు అప్రోచ్‌ రోడ్డుమీదుగా పాతపోస్టాఫీసుకు వాహనాల రాకపోకలను మళ్లిస్తున్నామని తెలిపారు. ఈ విషయాన్ని భక్తులు గమనించాలని కోరారు. టౌన్‌ కొత్తరోడ్డు నుంచే పందిళ్లు వేశామని చెప్పారు. దేవదాయశాఖకు చెందిన దాదాపు 150 మంది ఉద్యోగులను విధుల్లో నియమించామని చెప్పారు. పోలీసు శాఖ పరంగా గట్టిబందోబస్తు ఏర్పాట్లు చేస్తున్నట్లు చెప్పారు. భక్తులకు అవసరమైన తాగునీరు, మజ్జిగ ఉచితంగా సరఫరా చేస్తున్నామన్నారు. భక్తుల రద్దీని దృష్టిలో పెట్టుకొని ఉచితంగా అయిదు బస్సు సర్వీసులను నడుపుతున్నట్లు చెప్పారు. దేవస్థానం పరంగా నాలుగు, దాత సహాయంతో ఒకటి ఏర్పాటు చేసినట్లు చెప్పారు. అగనంపూడి, సింహాచలం, పెందుర్తి, మధురవాడ ప్రాంతాల నుంచి ఆలయం వరకు గురువారం ఉదయం 6గంటల నుంచి రాత్రి 9గంటల వరకు బస్సులు నడుపుతామని వివరించారు. ఈ అవకాశాన్ని భక్తులు సద్వినియోగం చేసుకోవాలన్నారు.

వ్యాఖ్యలు లేవు:

వ్యాఖ్యను పోస్ట్ చెయ్యండి